VІІІ қысқы Азия ойындары өтіп жатқан Жапонияның Саппоро қаласында Қазақстан Республикасы Ұлттық Олимпиада комитетінің президенті, Қазақстан бокс федерациясының басшысы Тимур Құлыбаев Иран Ұлттық Олимпиада комитетінің басшысы Кумарс Хашеми мырзамен кездесті.
Кездесу барысында тараптар спортты бірлесе отырып дамыту жөніндегі меморандумға қол қойды. Алдағы уақытта екі ел спортшылары өзара тәжірибе алмасып, бірлескен оқу-жаттығу жиындарын өткізетін болады.
Бүгінгі күнде Иран мемлекетінің спорты қарқынды түрде дамып келеді. Атап айтқанда, осы елдің балуандары мен зілтеміршілері әлемдік додаларда тамаша нәтижелерге қол жеткізіп жүр. Сондай-ақ, қазіргі таңда Иран елдегі спорттық инфрақұрылымды дамыту мәселесіне де жеткілікті түрде көңіл бөле бастаған.
Әріптестер мұндай игі қадамның екі жаққа да пайдасы тиіп, міндетті түрде оң нәтиже береріне сенім білдірді.
