Қазақстандық боксшы Иван Дычко Олимпиаданың жартылай финалында британдық Джо Джойспен жекпе-жектегі жеңілісі жайлы айтып берді.
«Осылай жасағанда, былай болмағанда деп ештеңе айтқым келмейді, қолымнан келгенін жасадым, - деді «Хабарға» берген сұхбатында Дычко. - Соңғы раундта шаршап қалдым, бар күшімді салдым. Бұйырғаны сол. Физикалық тұрғыдан ұтылдым, Джойс раундтан раундқа тынысы кеңейетін мықты боксшы. Жеңілдім, бұған ешкім де кінәлі емес. Бұл медальға қуанып та тұрғаным жоқ, өкпем де жоқ. Төрт жыл бұрын «қола» алғаным көңілімді түсірген еді. Осы жолы барға қанағат тұтуды жөн санадым».
