U19 қыздар құрамасының аға жаттықтырушысы Жанкелді Ахметов әлем чемпионатының қорытындысын шығарып, спортшылардың өнеріне баға берді. 

«Спортшыларымызды, олардың бапкерлерін және спорт басшыларын құттықтаймын. Жалпы, жарыс алдында 4 алтын медаль аламыз деп жоспарлаған едік. Алайда бұл мақсатқа толық жете алмадық.

Зарина Толыбайды, Камила Оспанованы, Мадина Жұмақанды және Алина Құдайгенованың осы әлем чемпионатында жеңіске жетуін күткен болатынмын. Алинаның жекпе-жегін өздеріңіз де көрдіңіздер. Жақсы өнер көрсетті, бірақ жеңіске жетуге күші жетпей қалды. Мадина Жұмақан да өзбекстандық боксшыдан жеңіліп қалды. Дегенмен оның да өнерін жақсы бағалаймын.

Жалпы, қыздардың өнеріне көңілім толады. Бір-екі салмақта қателіктер жібердік. Қалған спортшыларымыздың барлығы жақсы жұдырықтасты», – деді Жанкелді Ахметов.

Бас бапкердің айтуынша, әлем чемпионатынан кейін 2008 жылы туған спортшылардың басым бөлігі ересектер санатына ауысады.

«Қазіргі жастар құрамасының 80 пайызы ересектер арасында өнер көрсететін болады. Ал жастар арасындағы Қазақстан чемпионаты Қостанай қаласында 29 қараша мен 6 желтоқсан аралығында өтеді. Оған әлем чемпионатына қатысқан қыздарымызбен қатар еліміздің барлық өңірінен келген командалар қатысады», – деді ол.

World Boxing халықаралық федерациясының ұйымдастыруымен өткен әлем чемпионаты 16–27 қазан аралығында өтті. Дүбірлі додаға 69 ұлттық федерациядан 474 боксшы қатысып, ерлер мен әйелдер арасында 20 салмақ дәрежесі бойынша жүлделерді сарапқа салды.

Бокстан Будва (Черногория) қаласында өткен World Boxing ұйымының екінші U19 әлем чемпионаты ресми түрде мәресіне жетті.

Қазақстан құрамасының қоржынына жалғыз алтын медальді Зарина Толыбай салды. Ол 80 келіден жоғары салмақ дәрежесіндегі финалда ресейлік Самира Итониеваны 4:1 есебімен жеңіп, әлем чемпионы атанды.

Ал қазақстандық үш боксшы финалда қарсыластарына есе жіберіп, күміс жүлдені қанағат тұтты. Атап айтқанда, 70 келіде Бейбарыс Әшірбай ирландиялық Джон Донохьюден, 57 келіде Алина Құдайгенова ресейлік Анастасия Голуновадан, ал 90 келіден жоғары салмақта Владислав Саможонов өзбекстандық Ислам Салиховтан жеңілді.

Сондай-ақ Қазақстан құрамасының төрт өкілі қола медальға қол жеткізді. Олар:

Мадира Жұмакан – 51 келі;

Индира Қыдырмолдаева – 60 келі;

Данияр Ақбісенов – 60 келі;

Еркетан Жарқынбек – 90 келі.

Осылайша, Қазақстанның қыздар құрамасы бір алтын, бір күміс және екі қола медаль жеңіп алса, ерлер құрамасы екі күміс және екі қола жүлдемен шектелді.

World Boxing халықаралық федерациясының ұйымдастыруымен өткен әлем чемпионаты 16–27 қазан аралығында өтті. Дүбірлі додаға 69 ұлттық федерациядан 474 боксшы қатысып, ерлер мен әйелдер арасында 20 салмақ дәрежесі бойынша жүлделерді сарапқа салды.

Черногорияның Будва қаласында World Boxing ұйымының U19 санатындағы әлем чемпионатының оныншы жарыс күнінде 8 отандасымыз жартылай финалдық жекпе-жектерін өткізді.

70 келідегі басты фаворит саналатын Бибарыс Әшірбай 1/2 финалда Зулфикор Адхамжоновтан (Өзбекстан) айласын асырып, 4:1 есебімен басым түсті.

Отандасымыз 3 раундта да қарсыласынан қарағанда жылдам қимылдап әрі дөп соққыларымен ерекшелене білді.

57 келідегі Алина Құдайгенова 1/2 финалда Ярио Женгпен (Қытай) айқасып, 3:2 есебімен басым түсті.

Қос боксшы да 3 раунд бойы шиеленісті айқас өткізіп, жекпе-жектің тағдыры тек шешуші раундта ғана шешілді.

Аса ауыр салмақтағы Зарина Толыбай 1/2 финалда Мирей Догрумен (Түркия) жұдырықтасып, 5:0 есебімен жеңіске жетті.

Кештің соңғы жекпе-жегінде +90 келідегі Владислав Саможонов 1/2 финалда Сафдар Маммадзадамен (Әзербайжан) айқасып, 5:0 есебімен басым түсті.

Алғашқы раунд қарсыластың пайдасына шешілгенімен, қалған уақытта отандасымыз жекпе-жектің бағытын өзгерте білді.

51 келідегі Мадира Жұмақан 1/2 финалда Назокат Мардоновамен (Өзбекстан) жұдырықтасып, 0:5 есебімен жол берді.

60 келідегі  Данияр Ақбисенов 1/2 финалда Едгардо Николас Пералтамен (Аргентина) жұдырықтасып, 0:3 есебімен жол берді.

60 келіде  Индира Қыдырмолдаева 1/2 финалда Шаша Вангпен (Қытай) өзара мықтыны анықтап, 1:3 есебімен есе жіберді.

Кешкі сессияда 90 келіде өз мүмкіндігін алған Еркетаң Жарқынбек 1/2 финалда Владислав Науменкомен (Украина) өзара мықтыны анықтап, 1:4 есебімен жол берді.

Айта кетейік, жаһандық дода 27 қазанда мәресіне жетеді.

Черногорияның Будва қаласында World Boxing ұйымының U19 санатындағы әлем чемпионатының тоғызыншы жарыс күнінде 7 отандасымыз өз бақтарын сынады.

55 келіде өз мүмкіндігін алған  Айдос Үсенов ширек финалда Ислам Магомедовпен (Ресей) жұдырықтасып, 0:5 есебімен жол берді.

Жекпе-жекте отандасымыз арақашықтықты қысқартып, жылдам соққыларға иек артса, Ресей боксшысы арақашықтықта ұпай жинады. Нәтижесінде төрешілер бірауыздан қарсыласты жеңімпаз деп таныды.

60 келіде  Индира Қыдырмолдаева 1/4 финалда Едмар Мунозбен (Венесуэла) шаршы алаңда жолығып, 5:0 есебімен басым түсті.

Отандасымыз 3 раундта да қарсыласынан бір бас жоғары өнер көрсетіп, төрешілердің бірауыз шешімімен жеңіске жетті.

60 келідегі  Данияр Ақбисенов 1/4 финалдаЖосуе Зепедамен (Мексика) айқасып, 4:1 есебімен айласын асырды.

Жекпе-жек барысында жерлесіміз қарсыласын 3 мәрте нокдаунға түсіріп, айқын басымдығын таныта білді.

70 келідегі басты үміткерлердің бірі - Бибарыс Әшірбай 1/4 финалда Асанте Ламармен (АҚШ) жұдырықтасып, 3:0 есебімен басым түсті.

Өте жоғарғы қарқында өткен айқаста жеңіске деген жігерін таныта білген жерлесіміз шабуылда белсенді болып, дөп соққыларын дарытты.

75 келіде алғашқы жекпе-жегіне шыққан Алтынгүл Аймұхан 1/4 финалда Шенжие Гонгпен (Қытай) айқас өткізіп, 0:5 есебімен жол берді.

Жерлесіміз алғашқы раундта белсенді қимылдап, есепте алға шықса да, қалған уақытта бойы мен қолы әлдеқайда ұзын Қытай боксшысы қашықтықта жекпе-жекті өз бақылауына алды.

Кешкі сессияда 51 келідегі Мадира Жұмақан 1/4 финалда Андреа Буелга Гарсиямен (Испания) жұдырықтасып, 3:2 есебімен жеңіске жетті.

Алғашқы раунд қарсыластың пайдасына шешілгенімен, қалған уақытта отандасымыз айқастың бағытын түпкілікті өзгертіп, жеңісті жұлып алды.

57 келідегі Алина Құдайгенова 1/4 финалда Сиобхан Халеймен (Англия) шаршы алаңда өзара мықтыны анықтап, 5:0 есебімен жеңіске жетті.

Қарсылас 3 раунд бойы отандасымызға қысым жасап, шабуылдаумен болса да, Алина қарымта шабуылда әр сәтті өз еншісіне шешіп отырды. Осылайша, жерлесіміз әлем чемпионатының жартылай финалына өтті.

World Boxing U19 әлем чемпионаты Будва қаласында 16–27 қазан аралығында өтуде. Турнирге 69 ұлттық федерациядан 474 спортшы қатысып жатыр.

Черногорияның Будва қаласында World Boxing ұйымының U19 санатындағы әлем чемпионатының сегізінші жарыс күнінде 8 отандасымыз шаршы алаңға шықты.

Ең жеңіл 48 келідегі Жадыра Қалтай 1/8 финалда Сиана Нонзфаламен (АҚШ) өзара мықтыны анықтап, 0:4 есебімен есе жіберді.

Жекпе-жек бойы отандасымыз қарсыласына қысымды арттырып, шабуылдаумен болды. Ал қарсылас қарымта шабуылда ұпай жинады. Нәтижесінде қос боксшы да 2-раундта нокдаунмен алмасып, жекпе-жекте төрешілер АҚШ өкілін мықты деп таныды.

57 келідегі Алина Құдайгенова 1/8 финалда Мейра Алвеспен (Бразилия) күш сынасып, 5:0 есебімен мерейі үстем болды.

Алғашқы раундтан-ақ жерлесіміз соққы алмасу барысында жылдамдық танытып, әр сәтті өз еншісіне жазып отырды. Нәтижесінде 3 раундта да Алина өзінің мықты екендігін дәлелдеді.

80 келіде  Айдана Убайдуллақызы 1/4 финалда София Новиковамен (Украина) жолығып, 0:5 есебімен қарсыласына жол берді.

Жекпе-жекте отандасымыз қарсыласына қысым жасап, басымдықты алуға тырысқанымен, қарсылас қарымта шабуылда дөп соққыларымен таразы басын өз пайдасына шешті.

Ең жеңіл 50 келідегі  Әділ Асқанбай 1/4 финалда Аарон Сарвармен (Шотландия) шеберлік байқасып, 2:3 есебімен жол берді.

65 келідегі Ақжүрек Қалабай 1/4 финалда Джейсон Махермен (Ирландия) жұдырықтасып, 2:3 есебімен есе жіберді.

Кешкі сессияда 70 келіде фавориттердің қатарына кіретін Камила Оспанова 1/4 финалда Ханан Кейнен Даоваджимен (Алжир) өзара мықтыны анықтап, 3-раундта мерзімінен бұрын есе жіберді.

90 келіде өз мүмкіндігін алған Еркетаң Жарқынбек 1/4 финалда Иоан Эрнандеспен (Германия) айқас өткізіп, 3:2 есебімен жеңіске жетті.

Жекпе-жек барысында отандасымыз белсенді қимылдап, қарсыласынан қарағанда белсендірек болды. Нәтижесінде төрешілер отандасымыздың жеңісін тіркеді.

Кешкі сессияда аса ауыр +90 келіде Владислав Саможонов 1/4 финалда Олувейоми Ремелмен (Германия) жолы түйісіп, 5:0 есебімен жеңіске жетті.

Жекпе-жек бойы отандасымыз толықтай үстемдік етіп, қарсыласын 2 мәрте нокдаунға түсірді.

World Boxing U19 әлем чемпионаты Будва қаласында 16–27 қазан аралығында өтуде. Турнирге 69 ұлттық федерациядан 474 спортшы қатысып жатыр.

Черногорияның Будва қаласында World Boxing ұйымының U19 санатындағы әлем чемпионатының жетінші жарыс күнінде 6 отандасымыз шаршы алаңға шықты.

55 келіде өз мүмкіндігін алған  Айдос Үсенов 1/8 финалда Иверсон Акостамен (Куба) шеберлік байқасып, 5:0 есебімен басым түсті.

Алғашқы раундтан отандасымыз бірінші нөмірде істесе, қарсылас қарымта шабуылға иек артты. Белсенді түрде шабуылдаған Айдос Үсенов 2-раундта Куба өкілін нокдаунға түсіріп, өз басымдығын арттыра білді.

Осылайша, жерлесіміз жаһандық доданың 1/4 финалына өтті.

65 келідегі Ақжүрек Қалабай 1/8 финалда Елдиар Тенисбековпен (Қырғызстан) жолығып, 5:0 есебімен мерейі үстем болды.

Қос боксшы да алғашқы раундтан жақын қашықтықта жұдырықтасып, алма-кезек шабуылмен алмасумен болды. Жекпе-жектің тағдыры шешуші 3 минутта шешіліп, отандасымыз басымдық танытты.

70 келіде фавориттердің қатарына кіретін Бибарыс Әшірбай 1/8 финалда Люк Насифпен (Аустралия) айқас өткізіп, 5:0 есебімен жеңіске жетті.

Алғашқы минуттан-ақ отандасымыз шабуыл және сауатты қорғанысы арқылы ұпай жинап, қарсыласының жоспарын асыруға мүмкіндік бермеді. Нәтижесінде Бибарыс 3 раунд бойы Аустралия өкілінен сенімді түрде айласын асырды.

Кешкі сессияда 51 келідегі Мадира Жұмақан 1/8 финалда Корин Мари Фавимен (Италия) жұдырық түйістіріп, 5:0 есебімен басым түсті.

Алғашқы раундтан Италия боксшысы шабуылға ден қойып, басымдықты өз қолына алуға тырысса, отандасымыз қарымта шабуылда аянып қалмады. Ал шешуші раундта Мадира қарсыласын нокдаунға жіберіп, жеңімпаз тағдырын шешіп тастады.

60 келіде Данияр Ақбисенов 1/8 финалда Фуркан Авармен (Түркия) жолы түйісіп, 3:2 есебімен жеңіске жетті.

Алғашқы раундтан айқас өте жоғары қарқында өтіп, қос тарап та жеңіс үшін соңғы секундқа дейін барын салды. Нәтижесінде соққы жағынан дәлдік танытқан отандасымыздың мерейі үстем болды.

Кешті түйіндеген 80 келідегі  Тимур Тайбеков 1/8 финалда Прохор Старцевпен (Ресей) күш сынасып, 2-раундта мерзімінен бұрын есе жіберді.

World Boxing U19 әлем чемпионаты Будва қаласында 16–27 қазан аралығында өтуде. Турнирге 69 ұлттық федерациядан 474 спортшы қатысып жатыр.

Черногорияның Будва қаласында World Boxing ұйымының U19 санатындағы әлем чемпионатының алтыншы жарыс күні басталды.

Күндізгі сессияда Камила Оспанова 70 келіге дейінгі салмақ дәрежесінде хорватиялық Лорена Хорватты жеңді. Қазақстандық боксшы қарсыласын үш рет нокдаунға жіберіп, үшінші раундта техникалық нокаутпен жеңіске жетті.

90 келіге дейінгі салмақта Еркетаң Жарқынбек мексикалық Рамиро Нуньесті төрешілердің бірауыздан шығарған шешімімен, 5:0 есебімен ұтты. Ал 65 келідегі  Айсұлу Мұхит өзінің екінші жекпе-жегін өтікізіп, 1/8 финалда Зое Вогелспен (Нидерланд) кездесті. 3 раунд бойы жоғары қарқында өткен жекпе-жекте төрешілер 1:4 есебімен жеңісті қарсыласқа берді.

Кешкі сессияда Индира Қыдырмолдаева 60 келіге дейінгі салмақта қырғызстандық Азизахон Пазилованы 5:0 есебімен жеңіп, турнирдегі жарысын жалғастырды.

Ал 85 келіге дейінгі салмақта сынға түскен Руслан Ахметов ресейлік Кирилл Коршаковтан 1:4 есебімен жеңіліп, әлем чемпионатындағы өнерін аяқтады.

World Boxing U19 әлем чемпионаты Будва қаласында 16–27 қазан аралығында өтуде. Турнирге 69 ұлттық федерациядан 474 спортшы қатысып жатыр.

Черногорияның Будва қаласында World Boxing ұйымының U19 санатындағы әлем чемпионатының бесінші жарыс күнінде 4 отандасымыз өнер көрсетті.

Күндізгі сессияда ең жеңіл 50 келідегі  Әділ Асқанбай 1/8 финалда осы салмақтың фавориті саналатын Михайло Сидоренкомен (Украина) шаршы алаңда жолықты.

Алғашқы раундта-ақ жерлесіміз қарсыласын 2 мәрте нокдаунға жіберіп, басымдыққа ие болды. Қалған уақытта Әділ Асқанбай дәл соққыларымен жеңісті есепті сақтап қалды. Қорытынды есеп: 4:1.

Күндізгі сессияда 65 келідегі Ақжүрек Қалабай 1/16 финалда Александр Живолоуппен (Эстония) жұдырықтасты.

Алғашқы минуттан отандасымыздың айқын басымдығы байқалып, ол қарсыласын 4 мәрте нокдаунға жіберді. Нәтижесінде төреші 2-раундта жекпе-жекті тоқтатуға шешім қабылдады.

80 келідегі Тимур Тайбеков 1/16 финалда Гонсало Родригеспен (Португалия) шеберлік байқасты.

Отандасымыз әр раунд сайын қарқынын арттырып, толықтай жекпе-жекті бақылауға алды. Нәтижесінде төрешілер 5:0 есебімен жеңісті жерлесімізге берді.

Кешкі сессияны +80 келідегі Зарина Толыбай тәмамдап, ширек финалда Френцис Таафакимен (Тувалу) жұдырықтасты.

Алғашқы раундтан-ақ қос боксшы да ашық шабуылға ден қойды. Нәтижесінде Зарина қарсыласын 3 мәрте нокдаунға жіберіп, 2-раундта техникалық нокаутпен жеңіске жетті.

Черногорияның Будва қаласында World Boxing ұйымының U19 санатындағы әлем чемпионатының төртінші жарыс күні басталды.

Қыздар арасында 54 келідегі Жанель Имантаева 1/8 финалда Росие Свейлеспен (Шотландия) шаршы алаңда кездесті.

3-раунд бойы шиеленісті өткен айқаста төрешілер 2:3 есебімен жеңісті қарсыласқа берді.

70 келіде басты фавориттердің қатарына кіретін Бибарыс Әшірбай 1/16 финалда Сантьяго Хименез Лоссомен (Аргентина) өзара мықтыны анықтады.

Алғашқы раундтан шеберлігі әлдеқайда жоғары отандасымыз қарсыластың адымын аштырмай, шабуыл мен қорғаныста да өте сауатты жұдырықтасты. Қорытынды есеп: 5:0.

Кешкі сессияда 60 келідегі Данияр Ақбисенов 1/16 финалда Сандро Капанадземен (Грузия) рингте жолы түйісті.

3 раунд бойы қос боксшы да жеңіс үшін аянып қалмай, өте шиеленісті айқас өткізді. Нәтижесінде төрешілер 3:2 есебімен отандасымызды жеңімпаз деп таныды.

Кешкі сессияда 75 келідегі Әмір Рамазан 1/16 финалда биылғы Азия чемпионы Сухроб Рахматуллаевқа (Өзбекстан) қарсылас атанды.

3 раунд бойы отандасымыз жеңіс үшін барын салып, басымдықты қолға алуға тырысқанымен, төрешілер 0:5 есебімен жеңісті қарсыласқа берді.

Айта кетейік, әлем чемпионаты 27 қазанға дейін жалғасады.

Черногорияның Будва қаласында World Boxing ұйымының U19 санатындағы әлем чемпионатының үшінші жарыс күні басталды.

Ерлер арасында 55 келіде өз мүмкіндігін алған Айдос Үсенов 1/16 финалда Разван-Йонит Панейнтпен (Румыния) өзара мықтыны анықтады.

Алғашқы раундтан-ақ қос боксшы қарқындарын арттырды. Отандасымыз шеберлік және дәл соққылар жағынан дәлдік таныта біліп, 5:0 есебімен жеңіске жетті.

85 келіде фавориттердің қатарына кіретін Руслан Ахметов 1/16 финалда Николай Ивановпен (Болгария) жұдырықтасты.

Отандасымыз 1-раундта-ақ қарсыласын бүйірден дамылсыз соққыға алып, толықтай басымдықты алды. Нәтижесінде 3-раундта да жерлесіміз төрешілердің шешімін өз жағына бұрып, 5:0 есебімен басым түсті.

19 жасқа дейінгі боксшылар арасындағы әлем чемпионаты 27 қазанға дейін жалғасады. Жарыста 69 елден келген 474 спортшы ерлер мен әйелдер арасындағы 20 салмақта чемпиондық атақ үшін таласады.