Новости

ҚАЗАҚСТАН ӘЙЕЛДЕР ҚҰРАМАСЫ ИТАЛИЯҒА АТТАНДЫ

22 февраля, 2024

Әлемдік лицензиялық турнирге қатысу үшін Қазақстан құрамасы Италияның Бусто-Арсицио қаласына аттанды, деп хабарлайды Қазақстан бокс федерациясының Баспасөз қызметі

Бас бапкер Шәміл Сафиуллин және Алуа Балқыбекова (50 келі) мен Жайна Шекербекова (54 келі) Апеннин түбегіне Алматы арқылы аттанса, Римма Волосенко (60 келі), Наталья Богданова (66 келі), Валентина Хальзова (75 келі) және өзге жаттықтырушылар алқасы Астана арқылы ұшты.

Лицензиялық турнир алдында боксшыларымыз Италияның Ассизи қаласында бір апталық оқу-жаттығу жиынын өткізеді. Жаттығу жиынына Қазақстан құрамасынан бөлек, турнирге қатысатын 30-ға жуық команданың боксшылары дайындықтарын пысықтамақ.

- Боксшыларымыздың дайындықтары жақсы. Италияда қыздарымыз аянып қалмайды. Жаттығу жиынында дайындығымызды әлі де пысықтаймыз. 25 ақпаннан бастап спаррингтік кездесулер өткіземіз де, Бусто-Арсицио қаласына 29 ақпанда шығамыз, - деді Шәміл Сафиуллин.

Айта кетейік, бүгінгі таңда Қазақстан әйелдер құрамасында Париж Олимпиадасының бір лицензиясы бар. Оны 57 келіде Карина Ибрагимова жеңіп алған. Ал Италиядағы турнирде әйелдер арасында Олимпиаданың 21 жолдамасы сарапқа салынады.

Қазақстан бокс федерациясының бас демеушісі – "Самұрық-Қазына" ҰӘҚ" АҚ,

Бас серіктесі - Sport Qory.