Қазақстанның бокс құрамасы ауыр жаттығулардан кейінгі қалпына келу үдерісін сапалы әрі тиімді ұйымдастыру мақсатында арнайы мұзды ванналармен қамтамасыз етілді.

Заманауи спортта қалпына келу әдістерінің маңызы ерекше. Соның бірі – криотерапия. Суық сумен қалпына келу процедуралары қарқынды жаттығулар мен жарыстардан кейін спортшылардың ағзасын сергітіп, физикалық дайындықты сақтауға бағытталған.

Арнайы мұзды ванналар боксшыларға жаттығу жүктемелерінен кейін қалпына келу процесіне қосымша жағдай жасауға мүмкіндік береді. Бұл спортшылардың жоғары деңгейдегі дайындықтарын үздіксіз жалғастыруына ықпал ететін заманауи тәсілдердің бірі.

Қазақстан құрамасының оқу-жаттығу процесінде спортшылардың тек жаттығуына ғана емес, олардың дұрыс әрі тиімді қалпына келуіне де ерекше мән берілуде.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

Алматы облысының Жаңашар ауылында ерлер құрамасының жазғы Азия ойындарына дайындық кезеңіндегі бірлескен оқу-жаттығу жиыны өтіп жатыр.

19 тамыз бен 1 қыркүйек аралығында өтетін жиынға Қазақстан құрамасынан бөлек, Ирак, Қытай және Англия елдері де келді. Негізгі мақсат – спортшылардың арнайы дене дайындығына көңіл бөлу.

Жаттығу барысында Азия ойындарында кездесуі мүмкін қарсыластарға бейімделуге ерекше көңіл бөлініп, боксшылардың техникалық және тактикалық дайындығы жетілдіріледі.

Айта кетейік, Қазақстан құрамасының боксшылары Алматы облысындағы оқу-жаттығу жиынын аяқтағаннан кейін қыркүйек айының басында Жапонияға аттанады. Жазғы Азия ойындарына дайындықтың соңғы кезеңі сол елде өтеді.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

2025 жылғы IBA әлем чемпионатында жүлдеге ие болған Қазақстан құрамасының боксшылары уәде етілген ақшалай сыйлықтарын алды.

Өткен жылдың желтоқсан айында Біріккен Араб Әмірліктерінің Дубай қаласында Халықаралық бокс қауымдастығының (IBA) бастамасымен әлем чемпионаты ұйымдастырылды. Бұл турнирде Қазақстан боксшылары үш алтын, бір күміс және екі қола медаль жеңіп алып, жалпы командалық есепте Ресейден кейін екінші орынға ие болды.

Бұған дейін IBA президенті Умар Кремлев чемпионат кезінде алтын медаль иегерлеріне 300 мың доллардан, күміс жүлдегерлерге 150 мың доллардан, ал қола жүлдегерлерге 75 мың доллардан сыйақы берілетінін мәлімдеген болатын. Тіпті ширек финалға дейін жеткен боксшылардың әрқайсысына 10 мың доллардан төлеу жоспарланған. Әлем чемпионатының жалпы жүлде қоры 8,3 миллион долларды құрады.

Арада біраз уақыт өткен соң уәде етілген қаражат спортшылардың есепшоттарына аударылды.

Еске салайық, Дубайдағы әлем чемпионатында Сәкен Бибосынов, Абылайхан Жүсіпов және Оразбек Асылқұлов алтын медаль жеңіп алды. Сабыржан Аққалықов күміс жүлдеге ие болса, Теміртас Жүсіпов пен Ертуған Зейнуллинов қола медальді қанжығалады.

2025 жылғы IBA әлем чемпионаты Біріккен Араб Әмірліктерінің Дубай қаласында 4-13 желтоқсан аралығында өтті. Қазақстан құрамасы сапында 13 боксшы өнер көрсетті. Турнир әуесқойлар боксындағы рекордтық 8,32 миллион доллар жүлде қорымен есте қалды.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

Жапонияда тұратын қазақстандық жанкүйерлер Азия ойындарында ұлттық бокс құрамасына тегін қолдау көрсете алады. Қазақстан бокс федерациясы отандастарымыз үшін арнайы жейделер мен жарысқа кіру билеттерін дайындады.

Жарыс Жапонияның Айти префектурасында орналасқан Нисио қаласында өтеді. Қазақстан құрамасы жарыстағы өнерін 21 қыркүйекте бастайды. Ал Азия ойындарының өзі 19 қыркүйекте Айти-Нагояда бастау алады.

Тегін билеттер мен атрибутиканы алу үшін жанкүйерлер Қазақстан бокс федерациясының өкілдеріне хабарласуы қажет. Ұйымның ресми үндеуінде байланыс деректері жарияланған.

Осылайша, жарыс кезінде Жапонияда болатын қазақстандықтар бокс турниріне қосымша шығынсыз кіріп, спортшыларымызға трибунадан қолдау көрсете алады.

Қазақстан құрамасы үшін бұл турнир маусымдағы маңызды жарыстардың біріне айналады. Азия ойындарында қазақстандық боксшылар 11 салмақта (6 ер, 5 әйел) жүлдеге таласады. Ал жанкүйерлер олардың алғашқы жекпе-жектерінен бастап шешуші кездесулеріне дейін қолдау көрсете алады.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

Бүгін Астанада Қазақстан бокс федерациясының президенті Шахмұрат Мүтəліп бокс саласының бірқатар маманын қабылдап, Спорт күнімен құттықтады.

Жиын барысында федерация басшысы қазақстандық бокстың халықаралық аренадағы жетістіктеріне тоқталып, спортшылармен қатар жаттықтырушылар, дәрігерлер, менеджерлер және басқа да мамандардың еңбегі зор екенін атап өтті.

«Барлығыңызды Спорт күнімен шын жүректен құттықтаймын! Еліміздің үздік спорт түрлерінің бірі – бокста нәтижеге қол жеткізіп, осы бағытта жұмыс істеп жүрген мамандардың еңбегі орасан зор.

Қазақстан Президенті Қасым-Жомарт Кемелұлы Тоқаев боксты ұлттық спорт деңгейіне көтеру өте маңызды міндет екенін атап өтті. Сонымен қатар, Мемлекет басшысы әр нәтиже – бірлескен жұмыстың жемісі екенін айтып жүр.

Демек, әлемдік аренада Қазақстанның байрағы жоғары көтерілсе, бұл жетістікте спортшының, жаттықтырушының, дәрігерлер мен менеджерлердің де үлесі бар. Сіздерге алғыс білдіремін және бүгінгі лайықты марапаттарыңызбен құттықтаймын!» – деді Шахмұрат Мүтəліп.

Іс-шара барысында бірқатар маманның спорт саласын дамытуға қосқан үлесі еленіп, мемлекеттік және ведомстволық марапаттар табысталды.

Атап айтқанда, Париж Олимпиадасының қатысушысы Мұхаммедсабыр Базарбайұлы «Ерен еңбегі үшін» медалімен марапатталды.

Қазақстан бокс федерациясы баспасөз қызметінің жетекшісі Назерке Сұлтанбекке «Дене шынықтыру мен спортты дамытуға сіңірген еңбегі үшін» төсбелгісі табысталды.

Ал төрешілер алқасының төрағасы Дінмұхамед Абайхан мен Қазақстан бокс федерациясының бас заңгері Әсел Ақпарова «Құрметті спорт қызметкері» төсбелгісімен марапатталды.

Марапаттау рәсімі отандық бокстың дамуына үлес қосып жүрген мамандардың еңбегін бағалап, олардың спорт саласындағы қызметіне қолдау білдіру мақсатында ұйымдастырылды.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

Алматы облысы Жаңашар ауылындағы спорт базасында Қазақстан әйелдер құрамасының оқу-жаттығу жиыны басталды.

Бұған дейін Елдос Сайдалин шәкірттері Америка Құрама Штаттарында бір айлық дайындық кезеңін өткізген еді.

Үлкен құрамда жаттығуға жиынына кіріскен әйелдер командасы екі апта бойы Алматы облысында дайындалып, қыркүйек айының басында Жапонияға аттанады.

Күншығыс елінде бірлескен жаттығу жиыны жоспарланып жатыр. Ал Азия ойындарындағы бокс бәсекесі 21 қыркүйек пен 2 қазан аралығында өтеді.

Айта кетейік, Азия ойындарында әйелдер 5 салмақта жүлдені сарапқа салады.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

Қазақстан бокс федерациясының вице-президенті Дархан Қызайбаев 2026 жылдың басты спорттық додаларының бірі саналатын Жапониядағы жазғы Азия ойындарына дайындық барысы туралы пікір білдірді.

«Жазғы Азия ойындарының соңғы екі циклінде алтын жүлде бұйырмай келеді. Енді қыркүйек айында Жапонияда өтетін бәсекеге үмітіміз зор. Біздің боксшылар топ жарады дегенге кәміл сенімдімін. Бұйырса, қазақ боксының үстемдігін дәлелдеп, Азия ойындарын сәтті өткізуді көздеп отырмыз.

Қазір боксқа өте жақсы жағдай жасалған. Федерациядан бөлек, министрлік пен өңірлік федерациялар тарапынан да қолдау бар. Оларға алғысымыз шексіз. Оқу-жаттығу жиындары үздіксіз өтіп жатыр. Халықаралық жарыстарда негізгі құрамдағы спортшылармен қатар, резервтегі боксшыларға да өз мүмкіндігін көрсетуге жағдай жасалуда.

Екі жылдан бері шетелдік мамандарды тартып, тәжірибе алмасып келеміз», – деді Дархан Қызайбаев.

Айта кетейік, ХХ Азия ойындары 19 қыркүйек пен 4 қазан аралығында Жапонияның Айти-Нагоя қаласында өтеді. Бокстан әйелдер арасында бес, ерлер арасында алты салмақта жүлделер сарапқа салынады.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

Спорт күні қарсаңында Қазақстан Республикасы Ұлттық Олимпиадалық комитетінде спорт қауымдастығы өкілдерін марапаттау рәсімі өтті.

Отандық спорт пен олимпиадалық қозғалыстың дамуына қосқан үлесі үшін спортшылар, жаттықтырушылар және спорт саласының мамандары Қазақстан ҰОК-нің Құрмет белгілерімен марапатталды.

«Қазақстан Республикасы Олимпиадалық қозғалысының еңбек сіңірген қайраткері» I дәрежелі Құрмет белгісімен:

Назым Қызайбай - 2024 жылғы Париж Олимпиадасының қола жүлдегері, бокстан 2025 жылғы әлем чемпионы;

Нұрбек Оралбай - 2024 жылғы Париж Олимпиадасының күміс жүлдегері;

Айбек Оралбай - бокстан 2025 жылғы әлем чемпионы;

Елдос Сайдалин - бокстан Қазақстан Республикасы әйелдер ұлттық құрамасының бас бапкері;

Асқар Еркебаев - бокстан Қазақстан ұлттық құрамасының аға жаттықтырушысы;

Дархан Қызайбаев - «Қазақстан бокс федерациясы» заңды тұлғалар бірлестігінің халықаралық байланыстар жөніндегі вице-президенті;

«Қазақстан Республикасы Олимпиадалық қозғалысының еңбек сіңірген қайраткері» II дәрежелі Құрмет белгісімен:

Долкунжан Камеков - бокстан Қазақстан әйелдер ұлттық құрамасының аға жаттықтырушысы.

ҰОК-нің құрмет белгілері спорт пен олимпиадалық қозғалыстың дамуына қосқан елеулі үлесі, кәсіби жетістіктері, сондай-ақ, қазақ спортын өркендетуге және жоғары деңгейдегі спортшыларды даярлауға бағытталған көп жылғы еңбегі үшін табысталады.

Айта кетейік, Қазақстанда Спорт күні жыл сайын тамыз айының үшінші жексенбісінде атап өтіледі.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

Қазақстан әйелдер бокс құрамасының капитаны Назым Қызайбай әлеуметтік желідегі парақшасында мақсатқа жету мен болашақтағы жеңістер жолындағы еңбектің және тәртіптің маңыздылығы туралы жазба жариялады.

«Бүгін Олимпиада ойындарының аяқталғанына тура екі жыл болды.

Кейде уақыттың қаншалықты тез өтіп жатқанын түсіну де қиын. Кеше ғана болғандай еді. Ал арада екі жыл өтіп кетіпті.

Өміріміздің басым бөлігі жаттығу залында өтеді. Осы жолда біз барымызды саламыз: уақытымызды, күшімізді, энергиямызды, денсаулығымыз бен эмоцияларымызды арнаймыз. Барлығы бір кездері алдымызға қойған арманымыз бен мақсатымыз үшін.

Ең қызығы, көп жылдық еңбектің нәтижесінде қалағаныңа қол жеткізгеннен кейін де тоқтағың келмейді. Керісінше, бұдан да биік мақсаттарға ұмтылуға деген құлшыныс пайда болады. Өйткені бір жетістік – соңы емес, келесі деңгейдің бастауы.

Сондықтан алдарыңа үлкен мақсаттар қоюдан қорықпаңдар. Үлкен армандардан қорықпаңдар және қиын жолды таңдаудан тартынбаңдар.

Ең бастысы – еңбек ету, өзіңе сену және қандай жағдай болса да, жұмысты жалғастыру. Өз ісіңе адал болу. Қызығатын ісіңді шын жүрегіңмен жақсы көріп, осы жолға бар күшіңді арнау.

Өйткені үлкен мақсаттарға бір күнде қол жеткізу мүмкін емес. Оның артында жылдар бойғы еңбек, тәртіп, шыдамдылық, қателіктер, жеңістер мен өзіңе деген сенім тұр. Егер өз ісіңді шынымен жақсы көрсең – тоқтама. Еңбек ет. Сен. Алға ұмтыл.

Ең үлкен жеңістер әлі алда», – деп жазды спортшы Instagram парақшасында.

Парижде өткен 2024 жылғы Олимпиада ойындарында Қызайбай 50 келі салмақта қола медаль жеңіп алды. Спортшы Қазақстан тарихындағы бокстан үш дүркін әлем чемпионы атанған алғашқы боксшы. Ол 2014, 2016 және 2025 жылдары әлем чемпионатында алтын медаль иеленді.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

Биыл Ташкентте (Өзбекстан) өтетін бокс бойынша әлем кубогының финалдық кезеңінің мерзімі өзгертілді. Енді жарыс 2026 жылғы 26 қараша мен 4 желтоқсан аралығында өтеді.

Бастапқыда турнирді 2026 жылғы 25 қараша мен 2 желтоқсан аралығында өткізу жоспарланған болатын.

Ташкенттегі турнир 2026 жылғы бокс бойынша әлем кубогы сериясының қорытынды кезеңі болады. Бұған дейін жарыстың кезеңдері сәуір айында Бразилияда және маусым айында Қытайда өткен.

Финалдық турнирде World Boxing әлемдік рейтингіне есептелетін ұпайлар сарапқа салынады. Бұл ұпайлар 2027 және 2028 жылдардағы Олимпиада ойындарына іріктеу жарыстарындағы спортшылардың жеребедегі орналасу тәртібін анықтау кезінде пайдаланылады.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.

XX Азия ойындарын-2026 ұйымдастыру комитеті бокс бойынша әр салмақ дәрежесіндегі жарыстардың ресми кестесін бекітті.

Жарыстар 2026 жылғы 21 қыркүйек пен 2 қазан аралығында өтеді. Алдын ала жекпе-жектер 21 қыркүйекте басталып, жартылай финалдық кездесулер 29 және 30 қыркүйекте ұйымдастырылады. Турнир 2 қазанда финалдық жекпе-жектермен аяқталады.

Жарыс кестесінде ерлер мен әйелдер арасындағы әр салмақ дәрежесі бойынша спортшылардың өнер көрсететін күндері көрсетілген. Бұл командаларға Азиядағы ең беделді көпсалалы турнирлердің біріне дайындықты түпкілікті пысықтауға мүмкіндік береді.

Алдын ала кезеңде жарыстар күніне екі сессиядан өтеді. Күндізгі сессиялар жарыс күніне байланысты сағат 12:00 немесе 13:00-де, ал кешкі сессиялар 17:00-де басталады. 2 қазандағы финалдық жекпе-жектер де екі сессияға бөлінеді.

Ерлер арасында 55, 60, 70, 80, 90 және 90 келіден жоғары салмақ дәрежелері бойынша жарыстар өтеді. Ал әйелдер 51, 54, 60, 65 және 75 келіге дейінгі салмақ санаттарында сынға түседі.

Ұйымдастыру комитеті жарыс кестесіне өзгерістер енгізілуі мүмкін екенін атап өтті. Қажет болған жағдайда жекелеген сессиялардың өткізілу уақыты мен күндері түзетілуі ықтимал.

Айти-Нагоя-2026 XX Азия ойындарының бокс турниріне Азияның үздік боксшылары қатысып, құрлық чемпионы атағы мен Азия ойындарының медальдары үшін бақ сынайды.

Қазақстан бокс федерациясының бас  серіктесі - “Самұрық Қазына” АҚ, серіктесіміз - “Sport Qory” туризм индустриясы мен спортты қолдау қоры.