Еліміздің барлық өңірінен келген 500-ге жуық бокс жаттықтырушы-оқытушысы Астанада 72 сағаттық біліктілікті арттыру курсынан өтті. 

Бағдарлама аясында алғашқы медициналық көмек көрсету, антидопинг талаптары, жаттығу үдерісін тиімді ұйымдастыру және өзге де маңызды тақырыптар қамтылды. Курсты қорытындылаған емтиханнан сәтті өткен мамандарға арнайы куәліктер табысталды.

22–29 шілде аралығында өткен курс Қазақстан Республикасы Туризм және спорт министрлігі Спорт және дене шынықтыру істері комитетінің «Дене шынықтыру және спорт бойынша республикалық оқу-әдістемелік және талдау орталығы» РМҚК ұйымдастыруымен өткізілді.

Астанада «Integra Construction KZ» компаниясының дәстүрлі бесінші Спартакиадасының салтанатты ашылу рәсімі өтті.

Биылғы жарыс та спорттық жарыс рухын және командалық бірлікті нығайтуға арналған. Спартакиада аясында қатысушылар 10 спорт түрінен бақ сынап жатыр: мини-футбол, волейбол, қазақ күресі, үстел теннисі, армрестлинг, шахмат, киберспорт, тоғызқұмалақ.

Олимпиада чемпионы Серік Сәпиев, әлем чемпионы Мерей Ақшалов, Олимпиада жүлдегерлері Әділбек Ниязымбетов пен Қамшыбек қоңқабаев қатысушыларға сәттілік тілеп, салауатты өмір салты мен бірлікті ту еткен бірегей іс-шараға қолдау көрсетті.

Бокстан 2026 жылы ел ішінде өтетін ішкі біріншіліктердің уақыты толықтай белгілі болды.

Ересектер арасындағы ел чемпионаты 24 қазан - 1 қараша аралығында Тараз қаласында өтетін болды. Бұған дейін бұл шаһар ел додасын 2014 жылы өткізген еді.

Одан бөлек, басқа жас санаттары бойынша да ел чемпионаттары ұйымдастырылады:

U17 санаты 7-13 қараша аралығында Ақтау қаласында ұйымдастырылады.

U19 санаты 15-22 қараша аралығында Астана қаласында өтеді.

U17 және U19 санатындағы әйелдердің бәсекесі 29 қараша мен 5 желтоқсан күндері аралығына жоспарланған.

2026 жылғы Қазақстан чемпионаттары ұлттық құраманы жасақтау мен халықаралық жарыстарға іріктеу тұрғысынан маңызды дода саналады.

Қазақстанның ерлер және әйелдер ұлттық бокс құрамалары Жапонияда өтетін жазғы Азия ойындарына дайындық аясында АҚШ-тың Лос-Анджелес қаласында 36 күндік оқу-жаттығу жиынын өткізуде.

Жиынның негізгі мақсаты – Санта-Моникада жалпы дене дайындығын жетілдіру және америкалық кәсіпқой боксшылармен спаррингтік кездесулер өткізу. Қазақстандық делегация АҚШ-тағы дайындықты 8 тамызда аяқтап, Азия ойындары алдындағы соңғы оқу-жаттығу кезеңін өткізу үшін тікелей Жапонияға аттанады.

Оқу-жаттығу жиынына қатысып жатқан ұлттық құраманың боксшысы Виктория Графеева дайындық барысы туралы пікірімен бөлісті.

– Дайындық өте қарқынды өтіп жатыр. Әр күніміз минутына дейін жоспарланған. Жаттығу, қалпына келу, техникалық және физикалық дайындықты жетілдіруге бағытталған жұмыстардың барлығы нақты кесте бойынша жүргізілуде. Бұл жиынның басты ерекшелігі – жаңа спарринг-серіктестердің көптігі және олардың бокс мәнерінің өзгешелігі. Сондықтан жаңа жағдайға тез бейімделуге тура келеді.

Боксшының айтуынша, АҚШ-тағы жиын халықаралық тәжірибе жинақтап, шеберлікті шыңдауға үлкен мүмкіндік беріп отыр.

– Басты мақсатымыз – маңызды жарыстардың алдында дайындық деңгейін барынша арттыру. Мұнда мықты спортшылармен спарринг өткізіп, жекпе-жек жүргізудің түрлі мәнерлерімен танысуға мүмкіндік бар. Мұның бәрі халықаралық тәжірибе жинауға және өз шеберлігіңді шыңдауға көмектеседі.

Сондай-ақ Виктория Графеева оқу-жаттығу жиынына жасалған жағдайдың жоғары деңгейде екенін атап өтті.

– Жағдай өте жақсы. Сапалы жаттығу өткізуге қажетті барлық мүмкіндік қарастырылған. Заманауи спорт залы, қажетті құрал-жабдықтар және қалпына келуге арналған жағдай бар. Соның арқасында бар назарымызды тек дайындыққа аудара аламыз.

Түркияның Кастамону қаласында Қазақстан мен Түркия боксшыларының бірлескен оқу-жаттығу жиыны аяқталды.

Оқу-жаттығу жиыны 15 шілдеде басталып, Түркия бокс федерациясының Кадыдагы оқу-жаттығу орталығында өтті.

Кастамонуда Қазақстан құрамасы сапында Диас Берікбай, Даниял Сабит, Бекзат Алдамжаров, Дамир Әбдіқадыр, Сәкен Бибосынов, Ерасыл Аманғалиев, Нұрсұлтан Алтынбек, Илья Калинин, Ертуған Зейнуллинов, Алмат Әбдуәли, Дархан Дүйсебай, Еркебұлан Шайкенов, Сержан Еркін, Азамат Бектас, Сұлтанбек Айбарұлы және Нұрлан Сапарбай сынды отандастарымыз дайындалды.

Кастамонудағы орталық Түркия бокс федерациясының негізгі биік таулы оқу-жаттығу базаларының бірі саналады. Мұнда әртүрлі жас санатындағы ұлттық құрамалар Еуропа және әлем чемпионаттарына, сондай-ақ Олимпиада ойындарына дайындық жүргізеді.

Сонымен қатар Қазақстанның ерлер және әйелдер құрамаларының негізгі құрамы АҚШ-тың Калифорния штатындағы Санта-Моника қаласында оқу-жаттығу жиынын өткізуде. Америка Құрама Штаттарындағы дайындық жазғы Азия ойындары алдындағы маңызды кезеңдердің бірі болмақ.

Азия бокс федерациясы (Asian Boxing) Индонезияның Джакарта қаласында өткен жастар арасындағы Азия чемпионатының үздік боксшыларын атады. Ерлер арасында Өзбекстан өкілі Элёр Рустамов (U-19, 55 кг) пен Жапония спортшысы Коити Накаяма (U-23, 60 кг) үздік деп танылды. Ал әйелдер арасында Үндістан боксшысы Пуджари (U-19, 51 кг) және Қазақстан құрамасының өкілі Азиза Исина (U-23, 70 кг) үздік боксшы атағына ие болды. Еске салсақ, 2026 жылғы жастар арасындағы Азия чемпионатында Қазақстан құрамасы жалпы 30 медаль жеңіп алды. Оның ішінде 11 алтын, 11 күміс және 8 қола жүлде бар. Ерлер арасында Бибарыс Әшірбай, Владислав Саможонов, Аман Қонысбек, Темірлан Мұқатаев және Ибрагим Бетаев Азия чемпионы атанса, әйелдер арасында Камила Оспанова, Айдана Убайдуллақызы, Зарина Толыбай, Гүлназ Бөрібаева, Азиза Исина және Шұғыла Нәлібай чемпиондық атақты жеңіп алды.

2024 жылдан бері жүзеге асып келе жатқан «AUYL SPORT» жобасы аясында «Халық» қайырымдылық қорының атқарушы директоры Ғалымбек Жақсылықов пен спорт менеджері Ғалым Сихимов Қазақстан бокс федерациясының бас хатшысы Самат Адхаммен жолығып, ауылдағы боксты дамыту мақсатында өзара меморандумға қол қойды.

Келісім аясында 2026 жылы Астана қаласында өтетін «AUYL SPORT» жобасының Республикалық бәсекесінде Қазақстан бокс федерациясы білікті төрешілермен қамтамасыз етуге атсалысса, «Халық» қайырымдылық қоры бапкерлер, төрешілердің біліктілігін арттыруға бағытталған семинарларды ұйымдастырып, «AUYL SPORT» жобасындағы бокс жеңімпаздарын халықаралық турнирге қатысуын толықтай өз мойындарына алады.

«AUYL SPORT» жобасы - ауыл балаларына кәсіби түрде спортпен айналысуға мүмкіндік беретін бірегей бастама.

Шараның мақсаты - ауыл жастарының спортқа деген қызығушылығын арттыру, олардың тұлға ретінде қалыптасуына жағдай жасау.

«Команданың жалпы нәтижесіне көңіліміз толады. Азия чемпионатында 3 алтын, 3 күміс және 2 қола медаль иелендік. Осы уақытқа дейін бұл жарыс U22 Азия чемпионаты ретінде өтсе, биыл алғаш рет U23 Азия чемпионаты мәртебесінде ұйымдастырылды. Бұл өзгеріс - құрамамыздағы жастар санатынан енді ғана ауысқан боксшылар үшін жақсы тәжірибе болмақ.

Құрама сапында 70 келіде өнер көрсеткен Азиза Исинаның өнерін ерекше атап өтер едім. Ол мансабында алғаш рет Азия чемпионы атанып, өзінің жоғары деңгейін дәлелдей білді. Азия құрлығында чемпион атану оңай емес. Себебі, бұл аймақта Қытай мен Үндістан секілді алпауыттар ӘЧ және Олимпиада ойындарында тұрақты түрде жоғары нәтиже көрсетеді.

Енді елге оралған соң, әр боксшы жеке бапкерімен бірге қателіктерін саралайды. Ал алдағы оқу-жаттығу жиындарында жалпы дене дайындығы мен жұптық жұмысқа ерекше көңіл бөлеміз»

Айта кетейік, бұл санаттағы аруларымыз 3 алтын, 3 күміс, 2 қола медаль иеленген болатын.

«Азия чемпионатын жақсы деңгейде өткіздік деп есептеймін. Жігіттер өз мүмкіндіктерін көрсетті. Себебі, 10 салмақтың 8-інде мүмкіндіктер 50/50 болды. Әсіресе 55 келідегі Бексұлтан Боранбек пен 60 келідегі Нұрасыл Төлебек өздерін жақсы қырынан танытты. Дегенмен, ешкімді бөліп-жармаймын. Спортшылар бар күшін салды.

Азия чемпионатында бәсекелестіктің өте жоғары екенін бәріңіз де көрдіңіздер. Көптеген мемлекеттер барлық 10 салмаққа қатысушысын қоспаса да, өздері басымдық берген 3-4 салмақта өте мықты қарсылық көрсетті. Жалпы, Азиядағы бокс деңгейі жылдан-жылға өсіп келеді.

Енді чемпионат қорытындысын саралап, жіберілген қателіктермен жұмыс жүргіземіз. Сонымен қатар, U23 құрамасы үшін жеке Қазақстан чемпионатын өткізуді ұсынып отырмыз. Бұл осы жас санатындағы боксшылардың дайындық деңгейін жүйелі түрде көтеруге мүмкіндік береді.

Жас спортшылар ересектер арасындағы ел чемпионатының алғашқы кезеңдерінде-ақ фавориттерге қарсы шығып қалып жатады. Соның салдарынан олар өз әлеуетін толық аша алмай қалуы мүмкін.»

Айта кетейік, ерлер құрамасы бұл сында 3 алтын, 4 күміс, 1 қола медаль еншілеген еді.

Қазақстанның U19 әйелдер құрамасы Азия чемпионатын үш алтын және үш қола медальмен аяқтады. Осы орайда бас бапкер Жангелді Ахметов құрлық біріншілігінің қорытындысын шығарып, команданың нәтижесіне баға берді.

– U19 Азия чемпионаты сіздер үшін қалай өтті? Команданың жалпы нәтижесіне көңіліңіз тола ма?

– U19 Азия чемпионаты біз үшін үлкен тәжірибе мен маңызды сынақ болды. Жалпы команданың нәтижесіне көңіліміз толады. Спортшыларымыз бар күш-жігерін салып, ел намысын абыроймен қорғады. Әрине, әлі де жетілдіретін тұстар бар. Дегенмен, бұл жарыс алдағы жетістіктерге берік негіз қалады. Чемпионатты үш алтын және үш қола медальмен аяқтадық.

– Осы чемпионатта қай боксшылар өз әлеуетін толық көрсете алды? Ал кімдердің өнері күткендегідей болмады?

– Кейбір боксшылар өз мүмкіндіктерін толық пайдаланып, жоғары деңгейде өнер көрсетті. Ал кейбір спортшылардан бұдан да жоғары нәтиже күткен едік. Дегенмен, спортта жеңіс те, жеңіліс те болады. Бұл олардың әлеуеті төмен дегенді білдірмейді. Керісінше, мұндай жарыстар алдағы сындарға дайындалуға үлкен сабақ болады.

– Азиядағы бәсекелестік деңгейіне қандай баға берер едіңіз? Басқа құрамалардың деңгейі айтарлықтай өсті деп айтуға бола ма?

– Қазіргі таңда Азиядағы бәсекелестік өте жоғары деңгейде. Барлық құрамалар айтарлықтай күшейген, сондықтан әрбір жекпе-жек аса тартысты өтті. Әр қарсыласқа тыңғылықты дайындалу қажет. Мұндай жоғары деңгейдегі бәсекелестік біздің спортшылардың да шеберлігін шыңдауға ықпал етеді.

– Индонезияның климаттық жағдайына және уақыт белдеуіне бейімделу қалай өтті? Дайындық барысында немесе жарыс кезінде қандай да бір қиындықтар кездесті ме?

– Индонезияның ыстық әрі ылғалды климаты мен уақыт белдеуіне бейімделу жоспарға сай өтті. Алғашқы күндері аздап бейімделу кезеңі болғанымен, медициналық және жаттықтырушылар штабының жүйелі жұмысының арқасында спортшылар жарысқа толық дайын күйде шықты. Сондықтан бұл факторлар нәтижеге айтарлықтай әсер етті деп айта алмаймыз.

– Осы чемпионаттан кейін команданың негізгі кемшілігі ретінде нені атар едіңіз? Алдағы уақытта қандай бағыттарға басымдық беріледі?

– Бұл чемпионат команданың күшті тұстарымен қатар, әлі де жетілдіруді қажет ететін бағыттарын да көрсетті. Ең алдымен, жекпе-жек барысында тактикалық шешім қабылдау, тұрақтылық пен психологиялық дайындықты күшейту маңызды. Сонымен қатар техникалық шеберлікті жетілдіру, халықаралық тәжірибені арттыру және жоғары деңгейдегі жарыстарға тұрақты қатысуға басымдық береміз. Осы бағыттар бойынша жүйелі жұмыс жүргізсек, алдағы жарыстарда бұдан да жоғары нәтижелерге қол жеткіземіз деп сенеміз.

Индонезия астанасы Джакарта U19 және U23 санаттары бойынша Азия чемпионаты ресми түрде мәресіне жетті.

40 салмақта сынға түскен Қазақстан құрамасы 11 алтын, 11 күміс, 8 қоламен жалпы есепте 2-орынға тұрақтады.

U23 санаты.

Өзбекстан - 10 алтын, 3 күміс, 5 қола

Қазақстан - 6 алтын, 7 күміс, 3 қола

Үндістан - 3 алтын, 5 күміс, 7 қола

Жапония - 1 алтын, 2 күміс, 3 қола

Қырғызстан - 2 күміс, 5 қола

Моңғолия - 1 күміс

Оңтүстік Корея - 5 қола

Индонезия - 3 қола

Вьетнам - 1 қола

Бутан - 1 қола

Филиппин - 1 қола

Таиланд - 1 қола

Қатар - 1 қола

Тайпей - 1 қола

U19 санаты.

Өзбекстан - 11 алтын, 3 күміс, 1 қола

Қазақстан - 5 алтын, 4 күміс, 5 қола

Үндістан - 2 алтын, 7 күміс, 4 қола

Оңтүстік Корея - 1 алтын, 1 күміс, 3 қола

Индонезия - 1 алтын, 1 күміс, 2 қола

Жапония - 1 күміс, 5 қолаф

Тайпей - 1 күміс, 4 қола

Таиланд - 1 күміс, 1 қола

Қырғызстан - 6 қола

Вьетнам - 4 қола

Тәжікстан - 2 қола

Моңғолия - 1 қола

Қатар - 1 қола

Филиппин - 1 қола

Айта кетейік, жастар арасындағы Азия чемпионаты World Boxing ұйымының Азиядағы құрылымы – Asian Boxing ұйымының ұйымдастыруымен екінші рет өткізіліп отыр. Алғашқы чемпионат 2025 жылдың тамыз айында Бангкокта өткен болатын. Биылғы дода 4 шілдеде Индонезия астанасы Джакартада басталды. Жарыста U19 және U23 жас санатындағы ұлдар мен қыздар бақ сынауда. Азия чемпионатына барлығы 330-ға жуық спортшы қатысып жатыр.